Referuar një rasti të evidentuar publikisht në media kombëtare vizive, Operatori i Shërbimeve të Kujdesit Shëndetësor (OSHKSH) ka nisur një verifikim të menjëhershëm mbi procedurat e prokurimit në Qendrën Shëndetësore Vorë.
OSHKSH ka urdhëruar verifikimin e rastit nga Operatori Rajonal i Tiranës dhe do të marrë masa administrative ndaj çdo shkeljeje të konstatuar.
Institucioni mbetet i angazhuar për transparencën dhe zbatimin rigoroz të ligjit në të gjitha prokurimet publike.
Në vijim të kontrolleve administrative mbi respektimin e rregullave të prokurimit dhe administrimit financiar në institucionet shëndetësore, janë konstatuar shkelje në procesin e sigurimit të shërbimit të internetit në Qendrën Shëndetësore Vorë.
Verifikimet kanë evidentuar mangësi në procedurat e ndjekura, përfshirë mungesën e një procesi të rregullt të kontratës së dhurimit, mosrespektimin e detyrimeve për planifikimin vjetor dhe dokumentacion të paprotokolluar.
Bazuar në këto gjetje, është marrë masa disiplinore “Vërejtje me paralajmërim për largim nga puna” ndaj drejtoreshës së institucionit. Mbetemi të angazhuar për rritjen e transparencës dhe forcimin e disiplinës administrative në të gjitha institucionet shëndetësore.