Më 14 nëntor 2024, në ambientet e Drejtorisë Qendrore të Operatorit të Shërbimeve të Kujdesit Shëndetësor (OSHKSH), u zhvillua një takim i rëndësishëm për ndarjen e eksperiencave dhe praktikave më të mira mbi përmirësimin e cilësisë së kujdesit shëndetësor dhe sigurinë e pacientëve.
Takimi kishte si qëllim përçimin e njohurive dhe metodologjive ndërkombëtare të fituara nga kursi i organizuar nga Zyra e Cilësisë së Kujdesit dhe Sigurisë së Pacientëve të Organizatës Botërore të Shëndetësisë (OBSH) në Lisbonë, Portugali. Në këtë kurs, i cili trajtoi sfidat dhe mundësitë për rritjen e cilësisë në sistemet shëndetësore, morën pjesë përfaqësues nga shumë vende të botës, duke përfshirë dhe Shqipërinë.
Pjesëmarrësit e sotëm përfshinin përfaqësues të sektorëve dhe drejtorive të Shërbimit Parësor nga Njësitë Vendore të Kujdesit Shëndetësor, si dhe drejtues nga Drejtoritë Rajonale të OSHKSH-së. Diskutimet u fokusuan te implementimi i strategjive efektive për përmirësimin e cilësisë dhe sigurisë së pacientëve në sistemin tonë shëndetësor.
Klea Pashollari, e cila gjithashtu përfaqësoi Shqipërinë në këtë kurs ndërkombëtar, ndau eksperiencat e saj të përfituara nga pjesëmarrja në Lisbonë. Ajo theksoi rëndësinë e përshtatjes së praktikave të suksesshme ndërkombëtare në kontekstin lokal, duke siguruar që pacientët shqiptarë të marrin kujdes shëndetësor cilësor dhe të sigurt.
Takimi rezultoi me një shkëmbim të gjerë idesh dhe një plan veprimi për integrimin e metodologjive të reja në sektorët përkatës. Përfaqësuesit ranë dakord për të forcuar bashkëpunimin ndërmjet njësive vendore dhe qendrës, si dhe për të ndjekur trajnime dhe projekte të tjera ndërkombëtare në këtë fushë.
Ky aktivitet është një dëshmi e angazhimit të OSHKSH-së për të përmirësuar vazhdimisht standardet e kujdesit shëndetësor në Shqipëri, duke vendosur sigurinë dhe mirëqenien e pacientëve në qendër të sistemit.
