Më 26 shtator 2025, në Elbasan u zhvillua një aktivitet i veçantë në kuadër të Ditës Ndërkombëtare të Kontraceptivëve, i organizuar nga Operatori i Kujdesit Shëndetësor, në bashkëpunim me Drejtorinë Rajonale të Operatorit të Shërbimeve të Kujdesit Shëndetësor, Njësinë Vendore të Kujdesit Shëndetësor Elbasan dhe grupin rinor Youth Pulse Network, partner i OSHKSH. Takimi kishte në qendër edukimin, ndërgjegjësimin dhe bashkëpunimin për shëndetin riprodhues, duke sjellë së bashku mjekë të familjes, obstetër-gjinekologë, profesionistë të shëndetit, përfaqësues institucionalë dhe të rinj nga komuniteti.
Hapjen e prezantimit e bëri mjeku i familjes dhe njëkohësisht drejtuesi i NJVKSH Elbasan, z. Arben Ruçi, i cili theksoi rëndësinë e kontracepsionit si pjesë e kujdesit parandalues dhe thelbësor për shëndetin publik. Ai nënvizoi gjithashtu rolin e mjekëve në këshillimin e pacientëve, duke e parë edukimin mbi metodat kontraceptive si një element që ndikon drejtpërdrejt në mirëqenien e komunitetit.
Gjatë aktivitetit, mjekë obstetër-gjinekologë sollën perspektivën e tyre mbi promovimin e kontracepsionit tek të rinjtë e grupmoshës 18–25 vjeç, duke vënë në dukje se edukimi dhe qasja e drejtë në informim janë thelbësore për vendimmarrjen e tyre. Po ashtu, mjekët e familjes ndanë përvoja dhe raste konkrete nga praktika e përditshme, duke evidentuar rëndësinë e komunikimit të hapur dhe të qartë me pacientët lidhur me këtë temë.
Një moment i veçantë i aktivitetit ishte pjesëmarrja e Denis Ilias, përfaqësues i Youth Pulse Network. Ai solli perspektivën rinore mbi edukimin seksual dhe riprodhues, duke nënvizuar rëndësinë e përfshirjes së të rinjve në diskutime të tilla.
Takimi u mbyll me një sesion pyetje-përgjigjesh dhe diskutimesh të hapura, ku të rinjtë patën mundësi të drejtonin pyetje drejtpërdrejt te mjekët dhe profesionistët e shëndetit. Ky dialog nxiti reflektim mbi rëndësinë e edukimit dhe ndërgjegjësimit për kontracepsionin si një proces bashkëpunimi mes profesionistëve dhe komunitetit.
Ky takim shënoi një hap të rëndësishëm për të fuqizuar rolin e mjekut si këshillues i besuar dhe për të promovuar vendimmarrjen e informuar mbi shëndetin seksual dhe riprodhues. Përmes përfshirjes së të rinjve dhe theksimit të qasjes ndërprofesionale, aktiviteti kontribuoi në krijimin e një kulture më të hapur dhe më të shëndetshme për të ardhmen.
