Ministrja e Shëndetësisë dhe Mirëqenies Sociale, Prof. Evis Sala, së bashku me Drejtoreshën e Përgjithshme të OSHKSH, znj.Jeta Deda, zhvilluan një vizitë në Spitalin Bashkiak Kurbin. Ky spital i cili pasoi një proçes rindërtimi të plotë në vitin 2022, përbën sot institucionin kryesor shëndetësor për rreth 50,000 banorë të Bashkisë Kurbin, si dhe për një numër të konsiderueshëm turistësh, kryesisht gjatë pelegrinazhit në Kishën e Laçit.

Gjatë vizitës në Spitalin e Kurbinit, ministrja e Shëndetësisë dhe Mirëqenies Sociale, Prof. Evis Sala nënvizoi rëndësinë e menaxhimit efikas të shërbimeve për të garantuar kujdes të shpejtë dhe profesional për pacientët. Ajo theksoi gjithashtu se sistemi shëndetësor po forcohet përmes investimeve që synojnë rritjen e cilësisë së kujdesit për çdo familje.

Projekti i rindërtimit të Spitalit të Kurbinit nisi në vitin 2020 dhe përfundoi në shtator 2022, me ndërtimin nga e para të një spitali modern, pas dëmtimit të godinës së vjetër nga tërmeti i 26 nëntorit 2019. Sipërfaqja totale e spitalit është 6,256.6 m², nga të cilat 2,160.4 m² përbëjnë hapësirat e brendshme, ndërsa godina teknike ka një sipërfaqe prej 355,6 m². Kapaciteti i përgjithshëm i hospitalizimit është 32 shtretër, të ndarë në 10 shtretër në Shërbimin e Urgjencës dhe 22 shtretër në pavione. Personeli shëndetësor përbëhet nga 10 mjekë specialistë, 2 mjekë të përgjithshëm, 40 infermierë, 3 teknikë laboratori dhe 2 teknikë imazherie.

Spitali Bashkiak Kurbin ofron shërbime të plota spitalore dhe ambulatore. Shërbimi i Urgjencës, është i pajisur me hapësirë pritjeje, dhomë triazhimi, dhoma trajtimi sipas kodeve të emergjencës dhe sallë mikrokirurgjie për rastet kirurgjikale të menjëhershme. Shërbimi i Patologjisë mbulon trajtimin e patologjive internistike, ndërsa Shërbimi i Pediatrisë ofron kujdes të vazhdueshëm për fëmijët me sëmundje akute apo kronike. Reparti i Obstetrikë-Gjinekologjisë ofron shërbime obstetrike, gjinekologjike dhe ndjekje pas lindjes. Laboratori Klinik-Biokimik mbulon analizat biokimike, hematologjike dhe mikrobiologjike, ndërsa Shërbimi Ambulator përfshin specialitetet Kardiologji, Endokrinologji, Gastrohepatologji, Mjekësi Interne, Okulistikë, Nefrologji, Obstetrikë-Gjinekologji, Ortopedi, Pediatri, Psikiatri dhe Imazheri. Gjithashtu, spitali mbulon nëpërmjet patronazhimit një herë në javë, si dhe me kontribut vullnetar, shërbimet e Reumatologjisë, Onkologjisë, ORL-së dhe Dermatologjisë.

Spitali Bashkiak Kurbin mbetet pika kryesore e referimit për rastet urgjente në territorin e Bashkisë Kurbin, me shërbim urgjence që funksionon 24 orë në ditë. Gjatë periudhës janar-shtator 2025, shërbimi i urgjencës ka trajtuar 33,927 pacientë, prej të cilëve 1,499 janë transferuar drejt spitaleve të tjera për trajtime të specializuara. Në të njëjtën periudhë, shërbimi i poliklinikës ka realizuar 18,498 vizita ambulatore duke ofruar një gamë të gjërë shërbimesh diagnostike e konsulative. Një pjesë e rëndësishme e punës së institucionit mbetet edhe menaxhimi i shërbimeve me shtretër, ku spitali funksionon me 22 shtretër aktive në katër pavionet kryesore që përfshijnë, Mjekësinë e Përgjithshme, Pneumologjinë, Pediatrinë dhe Ostetrikë-Gjinekologjinë. Gjatë periudhës janar–shtator 2025, janë regjistruar gjithsej 410 pacientë të shtruar, nga të cilët 358 raste urgjente dhe 52 raste të planifikuara. Në Shërbimin e Mjekësisë së Përgjithshme janë trajtuar 224 pacientë, prej të cilëve 182 raste urgjente dhe 42 raste të planifikuara, ndërsa Shërbimi i Pneumologjisë ka trajtuar 48 pacientë, prej të cilëve 39 urgjentë dhe 9 të planifikuar. Në shërbimin e Pediatrisë janë trajtuar 138 fëmijë, nga të cilët 130 raste urgjente dhe 8 të planifikuara dhe në shërbimin e Obstetrikë-Gjinekologjisë janë regjistruar 48 pacientë, prej të cilave 46 raste urgjente dhe 2 të planifikuara.

Bazuar në të dhënat e periudhës janar–shtator 2025, Spitali Bashkiak Kurbin regjistron një ditë mesatare qëndrimi në spital prej 9.19 ditësh, shfrytëzim të shtretërve në nivelin 56.46% dhe xhiro e shtratit 11.18. Këto tregues reflektojnë një përdorim optimal të kapaciteteve ekzistuese spitalore dhe menaxhim të mirë të volumit të rasteve.

Spitali Bashkiak Kurbin është i pajisur me aparatura moderne mjekësore, përfshirë Digital X-Ray, ECG, Holter, pajisje të fizioterapisë si dhe aparatura të avancuara laboratorike, që garantojnë diagnostikim dhe trajtim cilësor të pacientëve. Gjatë periudhës raportuese  janë realizuar 78,406 analiza laboratorike, prej të cilave 6,478 për pacientët e shtruar, 62,720 për pacientë të referuar nga mjeku i familjes dhe 9,208 për rastet e urgjencës, duke treguar një shtrirje të gjerë të shërbimit laboratorik, i cili mbështet të gjitha pavionet klinike në diagnostikimin e saktë dhe në ndjekjen e pacientëve në trajtim. Në shërbimin e imazherisë janë kryer gjithsej 10,713 ekzaminime radiologjike dhe endoskopike. Ekzaminimet më të shpeshta kanë qënë ekografitë, me gjithsej 2,043 ekzaminime, EKG-të 1,888 ekzaminime, retgenoskopitë e toraksit me 1,830 ekzaminime dhe seancat e fizioterapisë me 2,076 ekzaminime, të cilat përbëjnë pjesën kryesore të aktivitetit diagnostik  të spitalit.

Rindërtimi i Spitalit të Kurbinit përfaqëson një nga investimet më të rëndësishme të realizuara në zonë pas tërmetit të vitit 2019. Spitali ofron një infrastrukturë moderne, me ambjente të standarteve të larta dhe kapacitete të zgjeruara, duke siguruar një shërbim më të mirë, efikas dhe më pranë nevojave të komunitetit.