Më 21 gusht 2025, Drejtoria Qendrore e Operatorit të Shërbimeve të Kujdesit Shëndetësor, zhvilloi një takim të rëndësishëm me përfaqësues të organizatës Save the Children Albania. Në këtë takim morën pjesë Drejtorja Ekzekutive e Save the Children Albania dhe Menaxhere Projekti, znj. Anila Meço, si edhe ekipi i projektit “Shkollat për Shëndetin”, znj. Suela Vasil si zv. menaxherja e projektit.

Drejtoresha e Përgjithshme e OSHKSH, znj. Jeta Deda, shprehu mirënjohjen e saj për bashkëpunimin e vazhdueshëm dhe kontributin e dhënë nga Save the Children Albania në implementimin e projektit “Shkollat për Shëndetin”, duke theksuar se ky bashkëpunim është një model i suksesshëm institucionalizimi të objektivave të përbashkëta në fushën e shëndetit publik dhe edukimit shëndetësor.

Një nga momentet më të rëndësishme të këtij bashkëpunimi është kalimi i materialeve të përgatitura nga projekti në faqen zyrtare të OSHKSH. Që prej fillimit të muajit gusht, në bashkëpunim me Save the Children Albania dhe Agjencinë Kombëtare të Shoqërisë së Informacionit, është krijuar një direktori e dedikuar në portalin e OSHKSH ku gjenden të gjitha dokumentet e projektit: fletëpalosje, manuale trajnimi, udhëzues, plane veprimi, koncepte dhe mjete digjitale që lidhen me edukimin shëndetësor dhe përmirësimin e shëndetit në mjediset shkollore.

Këto materiale do të shërbejnë si një mbështetje e drejtpërdrejtë për punën e drejtorive rajonale të OSHKSH, njësive vendore të kujdesit shëndetësor dhe profesionistëve të shëndetit në terren, duke i ndihmuar ata të ofrojnë shërbime më cilësore dhe të planifikuara në mënyrë të unifikuar

Po ashtu, ky hap përbën një kontribut të rëndësishëm për përgatitjen e draft–strategjisë pesëvjeçare të Operatorit të Shërbimeve të Kujdesit Shëndetësor.

Në përmbyllje të takimit, znj. Deda nënvizoi rëndësinë e këtij procesi jo vetëm për forcimin e rolit të koordinatorëve të shëndetit në shkolla dhe specialistëve të promocionit shëndetësor, por edhe për krijimin e një baze të qëndrueshme bashkëpunimi ndërmjet institucioneve publike dhe organizatave partnere.

Materialet janë tashmë të aksesueshme në faqen zyrtare të OSHKSH.